អង់គ្លេស៖ ក្លិបកាំភ្លើងធំ Arsenal បានប្រកាសលុបចោលដំណើរប្រកួតមិត្តភាពកំដៅសាច់ដុំ ឬហៅថា Pre-Season Tour របស់ខ្លួនទៅកាន់សហរដ្ឋអាមេរិកជាផ្លូវការ ក្រោយពេលក្លិបបានរកឃើញករណីឆ្លងកូវីដ-១៩ លើសមាជិករបស់ខ្លួន។ នេះបើយោងតាមការចុះផ្សាយរបស់សារព័ត៌មានកីឡាអង់គ្លេស Sky Sport។

ដំបូងឡើយ Arsenal គ្រោងនឹងធ្វើដំណើរទៅកាន់ទឹកដីសហរដ្ឋអាមេរិក ដើម្បីចូលរួមប្រកួតក្នុងពាន Florida Cup ដែលជាពានមិត្តភាពមួយ ដែលចូលរួមដោយក្លិបអង់គ្លេស Everton , ជើងឯកលីគអ៊ីតាលី Inter Milan រួមជាមួយក្លិបកូឡុំប៊ីមួយទៀតគឺ Millonarios។

យ៉ាងណាក៏ដោយ មកទល់ពេលនេះ ទាំងភាគីក្លិប Arsenal និងខាងអ្នករៀបចំពាននេះនៅមិនទាន់ចេញមុខប្រកាសផ្លូវការណាមួយជុំវិញបញ្ហានេះនៅឡើយ។

គួរបញ្ជាក់ថា មុនគ្រោងមកចូលរួមពាននៅអាមេរិកនេះ Arsenal បានប្រកួតមិត្តភាពចំនួន ២ប្រកួតនៅស្កុតលែនរួចមកហើយ ពោលគឺចាញ់ក្លិប Hibernian ១-២ និងប្រកួតចុងក្រោយស្មើក្លិបខ្លាំងរបស់ស្កុតលែនគឺ Ranger ក្នុងលទ្ធផល ២-២។

ក្រុមរបស់លោក Mikel Arteta បានបញ្ចប់ការប្រកួត Premier League រដូវកាលមុនក្នុងចំណាត់ថ្នាក់លេខ ៨ ពោលគឺពុំមានឱកាសលេងពានអឺរ៉ុបនារដូវកាលថ្មីនេះឡើយ ខណៈយុទ្ធនាការក្នុងបាល់អង់គ្លេស នឹងត្រូវជួបក្រុមឡើងមកថ្មី Brentford នៅថ្ងៃទី១៣ ខែសីហាខាងមុខនេះ៕